SUNTGOIA seu SUNTGOVIA vulgo SUNTGAW

SUNTGOIA, seu SUNTGOVIA, vulgo SUNTGAW

provincia Germaniae, Alsatiae annexa, quae aliter le Comte de Ferrette dicitur ab eius primaria urbe; subestque dominio Regis Franciae pace Monasteriensi. Terminatur a septentrione Alsatiâ, ab ortu Rhenô fluviô et pagô Basileensi, a meridie ditione Episcopi Basileensis, et ab occasu Burgundiae Comitatu. Eius urbes sunt Ferrera, Pfirt seu Ferrete, Befordia, Beford, Masonis monasterium, Masmunster, et Mulhusia, Mulhusen, quae tamen sui iuris, et Helvetiis foedere iuncta, vide quoque Sugintensis pagus.